അമേരിക്കയിൽ വിമാനങ്ങളുടെ പുറപ്പെടൽ നിർത്തിവെച്ചു; എയർ ട്രാഫിക് കൺട്രോൾ ആശയവിനിമയ സംവിധാനത്തിൽ തകരാർ

അമേരിക്കയിൽ വിമാനങ്ങളുടെ പുറപ്പെടൽ നിർത്തിവെച്ചു; എയർ ട്രാഫിക് കൺട്രോൾ ആശയവിനിമയ സംവിധാനത്തിൽ തകരാർ

വാർത്ത: പ്രസാദ് തീയാടിക്കൽ

വാഷിങ്ടൺ, നവംബർ 13: അമേരിക്കയിലുടനീളമുള്ള വിമാനത്താവളങ്ങളിൽനിന്ന് വിമാനങ്ങൾ പുറപ്പെടുന്നത് താൽക്കാലികമായി നിർത്തിവെച്ച് ഫെഡറൽ ഏവിയേഷൻ അഡ്മിനിസ്ട്രേഷൻ (FAA).

എയർ ട്രാഫിക് കൺട്രോൾ കേന്ദ്രങ്ങളിലെ ആശയവിനിമയ തകരാറിനെത്തുടർന്ന് സുരക്ഷ മുൻനിർത്തിയാണ് രാജ്യവ്യാപകമായി ‘ഗ്രൗണ്ട് സ്റ്റോപ്പ്’ ഏർപ്പെടുത്തിയത്.

ഇനിയൊരു അറിയിപ്പുണ്ടാകുന്നതുവരെ പുറപ്പെടാനിരിക്കുന്ന വിമാനങ്ങൾ നിലത്തുതന്നെ തുടരണമെന്നാണ് നിർദേശം.

അമേരിക്കയിലേക്കെത്തുന്ന അന്താരാഷ്ട്ര വിമാനങ്ങളുടെ കാര്യത്തിൽ സാഹചര്യങ്ങൾ വിലയിരുത്തി പ്രത്യേകം തീരുമാനമെടുക്കും.

ഇതിനകം ആകാശത്തുള്ള വിമാനങ്ങൾക്ക് ഇറങ്ങാൻ അനുമതിയുണ്ടെന്നാണ് റിപ്പോർട്ട്.

ആശയവിനിമയ തകരാർ പരിഹരിക്കുന്നതിനായി FAAയുടെ സാങ്കേതിക വിദഗ്ധർ പരിശോധന നടത്തിവരികയാണെന്ന് ഗതാഗത സെക്രട്ടറി ഷോൺ ഡഫി അറിയിച്ചു.

തകരാറിന്റെ കൃത്യമായ കാരണവും സർവീസുകൾ പൂർണമായി പുനരാരംഭിക്കാനുള്ള സമയവും ലഭ്യമായ റിപ്പോർട്ടുകളിൽ വ്യക്തമാക്കിയിട്ടില്ല.

2001 സെപ്റ്റംബർ 11 ആക്രമണങ്ങൾക്ക് ശേഷം രാജ്യവ്യാപകമായി വിമാനങ്ങളുടെ പുറപ്പെടൽ തടയുന്ന രണ്ടാമത്തെ സംഭവമാണിത്.

ഇതിനുമുമ്പ് 2023 ജനുവരി 11-ന് പൈലറ്റുമാർക്ക് സുരക്ഷാ വിവരങ്ങൾ നൽകുന്ന ‘NOTAM’ സംവിധാനത്തിലെ തകരാറിനെത്തുടർന്ന് സമാന നിയന്ത്രണം ഏർപ്പെടുത്തിയിരുന്നു.

യാത്രക്കാർ വിമാനത്താവളത്തിലേക്ക് പുറപ്പെടുന്നതിനുമുമ്പ് ബന്ധപ്പെട്ട വിമാനക്കമ്പനികളുമായി സർവീസിന്റെ നിലവിലെ സ്ഥിതി പരിശോധിക്കണം.