നൈജീരിയായില് പാസ്റ്ററെ കൊലപ്പെടുത്തി; കുടുംബാംഗങ്ങളെ തട്ടിക്കൊണ്ടുപോയി
സാംഫാര: നൈജീരിയായില് പ്രാദേശിക സഭയുടെ പാസ്റ്ററെയും കുടുംബാംഗങ്ങളെയും തട്ടിക്കൊണ്ടുപോയി.
രണ്ടു ദിവസത്തിനുശേഷം പാസ്റ്ററുടെ ജഡം കണ്ടെത്തി. വടക്കന് നൈജീരിയായിലെ സാംഫാര സംസ്ഥാനത്ത് ഗുസാവുവില് പാസ്റ്റര് ആന്റണി ജാട്ടാവുവാണ് കൊല്ലപ്പെട്ടത്.
ഫെബ്രുവരി 7-ന് പാസ്റ്റര് ആന്റണിയും ഭാര്യയും 3 കുട്ടികളും ബന്ധുക്കളായ രണ്ടു സ്ത്രീകളും കൂടി കാറില് പുതിയ പ്രവര്ത്തനമേഖലയായ കാഠ്സിഹ സംസ്ഥാനത്തെ സോക്കോട്ടോയിലേക്കു പോകുന്ന വേളയിലാണ് അക്രമികളായ ചിലര് വാഹനം തടഞ്ഞ് നിര്ത്തി തട്ടിക്കൊണ്ടുപോയത്. മോചന ദ്രവ്യത്തിനായിട്ടാണ് തട്ടിക്കൊണ്ടുപോയതെന്ന് പോലീസ് പറഞ്ഞു.
ഫെബ്രുവരി 9-ന് പാസ്റ്ററുടെ ജഡം വഴിയരികില് കണ്ടെടുക്കുകയായിരുന്നു. ഭാര്യയെക്കുറിച്ചും മറ്റുള്ളവരെക്കുറിച്ചും വിവരങ്ങള് ലഭ്യമല്ല.
2006 സെപ്റ്റംബറിലും പാസ്റ്റര് ആന്റണി തട്ടിക്കൊണ്ടുപോകലിന് ഇരയായിട്ടുണ്ട്. അന്ന് കര്ത്താവ് വിടുവിക്കുകയുണ്ടായി. പോലീസ് അന്വേഷണം ആരംഭിച്ചു.
