ഈ വര്‍ഷം കോളറാ കേസുകളുടെ എണ്ണം വര്‍ദ്ധിക്കുമെന്ന് ലോകാരോഗ്യ സംഘടന
കാലാവസ്ഥാ വ്യതിയാനം മൂലം ഈ വര്‍ഷം പല രാജ്യങ്ങളിലും കോളറാ കേസുകളുടെ എണ്ണം വര്‍ദ്ധിക്കാന്‍ സാദ്ധ്യതയുണ്ടെന്ന് ലോകാരോഗ്യ സംഘടന.
മുപ്പതോളം രാജ്യങ്ങളിലാണ് കഴിഞ്ഞ വര്‍ഷം കോളറ കേസുകള്‍ റിപ്പോര്‍ട്ടു ചെയ്തത്. വിബ്രിയോ കോളറ എന്ന ബാക്ടീരിയ വെള്ളത്തിലോ ഭക്ഷണത്തിലോ കലരുന്നത് വഴിയാണ് കോളറാ പിടിപെടുന്നത്.
ബാക്ടീരിയ ഉള്ളില്‍ ചെന്നാല്‍ 12 മണിക്കൂര്‍ മുതല്‍ അഞ്ച് ദിവസങ്ങള്‍ക്കുള്ളില്‍ ലക്ഷണങ്ങള്‍ പ്രത്യക്ഷമാകും.
ലോകത്ത് പ്രകൃതി ദുരന്തങ്ങളുടെ എണ്ണത്തില്‍ കഴിഞ്ഞ വര്‍ഷം വര്‍ദ്ധനയുണ്ടായിരുന്നു. ലോകത്ത് സംഭവിച്ച പ്രളയവും കാലാവസ്ഥാ വ്യതിയാനവും കാരണം കോളറ പോലുള്ള ജലജന്യ രോഗങ്ങള്‍ വര്‍ദ്ധിച്ചുവെന്നും റിപ്പോര്‍ട്ട് ചെയ്തിരുന്നു.
പാക്കിസ്ഥാനിലെ പ്രളയത്തെത്തുടര്‍ന്ന് അഞ്ച് ലക്ഷത്തോളം കോളറാ കേസുകളാണ് റിപ്പോര്‍ട്ട് ചെയ്തത്.
സുനാമി, പെരുമഴ, ചുഴലിക്കാറ്റ് തുടങ്ങിയ കാലാവസ്ഥയുമായി ബന്ധപ്പെട്ട മറ്റ് പ്രതിഭാസങ്ങളും, പ്രളയ സമയത്ത് വന്‍തോതില്‍ ജലം മലിനപ്പെടുത്തുന്നതുമാണ് കോളറ പോലുള്ള വ്യാധികള്‍ക്ക് കാരണമാകുന്നത്.
