യെമനിൽ വീണ്ടും രൂക്ഷ പോരാട്ടം; ഹൂത്തി ആക്രമണത്തിൽ നിരവധി സൈനികർ കൊല്ലപ്പെട്ടു
വാർത്ത: പ്രസാദ് തീയാടിക്കൽ
സനാ – ചെങ്കടൽ: ജൂലൈ 5 യെമനിലെ ചെങ്കടൽ തീരപ്രദേശത്ത് സംഘർഷം വീണ്ടും രൂക്ഷമായി.
ഇറാൻ പിന്തുണയുള്ള ഹൂത്തി സായുധസംഘം നടത്തിയ ആക്രമണത്തിൽ അന്താരാഷ്ട്ര അംഗീകാരമുള്ള യെമൻ സർക്കാരിന്റെ സൈന്യത്തിലെ 16 സൈനികർ കൊല്ലപ്പെട്ടതായി റിപ്പോർട്ടുകളുണ്ട്.
ഹൊദൈദ തുറമുഖത്തിന് തെക്കൻ മേഖലയിലാണ് ആക്രമണം നടന്നത്. കഴിഞ്ഞ ഏതാനും വർഷങ്ങൾക്കിടയിലെ ഏറ്റവും മാരകമായ ഏറ്റുമുട്ടലുകളിൽ ഒന്നായാണ് ഈ സംഭവം വിലയിരുത്തപ്പെടുന്നത്.
ഇതിനിടെ, യെമന്റെ ചെങ്കടൽ തീരത്തിന് സമീപം സഞ്ചരിച്ചിരുന്ന ഒരു ചരക്കുകപ്പലിനുനേരെയും ആയുധധാരികൾ ആക്രമണം നടത്തിയതായി ബ്രിട്ടീഷ് മാരിടൈം അധികൃതർ അറിയിച്ചു.
കപ്പലിന് നേരെ വെടിയുതിർക്കപ്പെട്ടെങ്കിലും, സുരക്ഷാ ഉദ്യോഗസ്ഥർ തിരിച്ചടിച്ചതോടെ ആക്രമികൾ പിന്മാറി.
കപ്പലിലുണ്ടായിരുന്ന ജീവനക്കാരെല്ലാം സുരക്ഷിതരാണെന്നും സംഭവത്തിൽ അന്വേഷണം പുരോഗമിക്കുകയാണെന്നും അധികൃതർ അറിയിച്ചു.
ആക്രമണത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല.
എന്നാൽ സംഭവം ഹൂത്തികളുടെ നിയന്ത്രണത്തിലുള്ള പ്രദേശത്തിന് സമീപമായതിനാൽ, മേഖലയിൽ വീണ്ടും കടൽഗതാഗത സുരക്ഷയെക്കുറിച്ചുള്ള ആശങ്ക ശക്തമായിരിക്കുകയാണ്.
ചെങ്കടലിലൂടെയുള്ള അന്താരാഷ്ട്ര വ്യാപാരക്കപ്പൽ ഗതാഗതത്തിനും ഈ സംഭവവികാസങ്ങൾ പുതിയ വെല്ലുവിളികൾ ഉയർത്തുന്നതായാണ് വിലയിരുത്തൽ.
