ചോദ്യത്തിനു മെറ്റ എഐ നല്കിയത് തെറ്റായ ഉത്തരം; മാപ്പ് പറഞ്ഞ് വാട്സാപ്പിലെ നീല വളയം
ഒരു മാസത്തിലേറെയായി വാട്സാപ്പ്, ഇന്സ്റ്റഗ്രാം, ഫേസ് ബുക്ക് എന്നീ സോഷ്യല് മീഡിയാ പ്ളാറ്റ്ഫോമുകളില് ഉപഭോക്താക്കളുടെ ഇടയില് ഏറെ ആകര്ഷകമായ ഒരു സാങ്കേതിക സംവിധാനമായി തിളങ്ങുകയാണ് മെറ്റ ആര്ട്ടിഫിഷ്യല് ഇന്റലിജന്സ്. മെറ്റ എഐ എന്ന ഈ നീല വളയം ഒട്ടുമിക്ക ചോദ്യങ്ങള്ക്കും ഉത്തരം നല്കും.
എന്നാല് ചില കാര്യങ്ങളില് ഈ ചാറ്റ് ബോട്ട് പരാജയപ്പെടുന്നു എന്നാണ് നിലവില് പുറത്തു വരുന്ന റിപ്പോര്ട്ടുകള്. പ്രത്യേകിച്ച് ഗണിത ചോദ്യങ്ങളിലാണ് മെറ്റ എഐ തോല്വി സമ്മതിക്കുന്നത്.
9.9 ആണോ 9.11 ആണോ വലിയ സംഖ്യ എന്ന ചോദ്യത്തിന് 9.11 എന്ന തെറ്റായ ഉത്തരമാണ് മെറ്റ എഐ നല്കിയത്. കാരണം വിശദീകരിക്കാന് ആവശ്യപ്പെട്ടപ്പോള് 9.11 നേക്കാള് 9.9-ന് 0.2 കുറവാണ് എന്നായിരുന്നു ഉത്തരം.
പിന്നീട് 9.9 എന്നത് 9.90 അല്ലേ, അപ്പോള് 9.90 എന്നത് 9.11 നേക്കാള് വലുതല്ലേ എന്നും ചോദിച്ചപ്പോള് തന്റെ തെറ്റ് സമ്മതിക്കുന്നു എന്നായിരുന്നു മെറ്റ എഐ നല്കിയ മറുപടി.
തെറ്റ് മനസ്സിലാക്കി തന്നതിന് നന്ദിയും പറഞ്ഞു. ഭാവിയില് ഈ തെറ്റ് വരുത്താതിരിക്കാന് ശ്രമിക്കുമെന്നും മറുപടിയിലുണ്ട്. ഇതേ സമയം മറ്റ് എഐ ചാറ്റ് ബോട്ടുകളോട് ചോദിച്ചപ്പോഴും ഇതേ രീതിയിലുള്ള മറുപടിയാണ് ലഭിച്ചത്.
9.11 ആണ് 9.9 നേക്കാള് വലിയ സംഖ്യ എന്നായിരുന്നു അവര് നല്കിയ ഉത്തരം. നിലവിലുള്ള മറ്റ് പല പ്രമുഖ ചാറ്റ് ബോട്ടുകളും ഇതേ രീതിയില് തെറ്റിച്ചാണ് ഉത്തരം നല്കുന്നതെന്നാണ് റിപ്പോര്ട്ടുകള് പുറത്തു വരുന്നത്.
