നൈജീരിയായില് ക്രൈസ്തവരുടെ 70 വീടുകള് അഗ്നിക്കിരയാക്കി; 6 പേര്ക്ക് പരിക്ക്
ബോര്ണോ: നൈജീരിയായില് ഇസ്ലാമിക തീവ്രവാദി സംഘടനയായ ബോക്കോഹറാം ക്രൈസ്തവരുടെ 70 വീടുകള് തീവെച്ചു നശിപ്പിച്ചു.
ആക്രമണത്തില് 6 വിശ്വാസികള്ക്ക് പരിക്കേറ്റു. നവംബര് 25-ന് വെള്ളിയാഴ്ച രാത്രിയില് ബോര്ണോ സംസ്ഥാനത്ത് ചിബോക്ക് നഗരത്തിനു സമീപം തളുലൈമാകലമ ഗ്രാമത്തിലാണ് ആക്രമണം അരങ്ങേറിയത്.
ആയുധങ്ങളുമായി ഇരച്ചെത്തിയ തീവ്രവാദികള് ക്രൈസ്തവരുടെ വീടുകളും, കടകളും കൊള്ളയടിച്ചശേഷം തീവെയ്ക്കുകയായിരുന്നു. ആക്രമണത്തില്നിന്നും താമസക്കാര് ഓടി രക്ഷപെട്ടതിനാല് ആളപായം ഒന്നും സംഭവിച്ചില്ല. എന്നാല് 6 പേര്ക്ക് പരിക്കേറ്റിട്ടുണ്ട്. ഇവരെ ആശുപത്രിയില് പ്രവേശിപ്പിച്ചു.
ക്രൈസ്തവര്ക്ക് സ്വാധിനമുള്ള ഈ ഗ്രാമത്തില് രാത്രിയുടെ മറവില് തീവ്രവാദികള് ക്രൂരത കാട്ടുകയായിരുന്നു. ചിബോക്കില് 2014 ഏപ്രിലില് 276 ക്രിസ്ത്യന് സ്കൂള് വിദ്യാര്ത്ഥിനികളെ ബോക്കോഹറാം തട്ടിക്കൊണ്ടു പോയിരുന്നു.
ഇവരില് ചിലര് രക്ഷപെട്ടുവന്നിരുന്നു. ചിലരെ തീവ്രവാദികള് കഴിഞ്ഞ മാസം മോചിപ്പിച്ചു. ഇനിയും നൂറിലേറെ കുട്ടികള് തീവ്രവാദികളുടെ കസ്റ്റഡിയില് കഴിയുകയാണ്.
