മ്യാന്മറില് പട്ടാളം പാസ്റ്ററെ വെടിവെച്ചുകൊന്നു
മ്യാന്മറില് മറ്റൊരു പാസ്റ്റര്കൂടി പട്ടാളത്തിന്റെ തോക്കിനിരയായി. സെപ്റ്റംബര് 14-ന് വൈകുന്നേരം 4 മണിക്ക് ചിന് സംസ്ഥാനത്തെ ലംബാങ്ങ് ഗ്രാമത്തിലുള്ള ലംസാങ് ബാപ്റ്റിസ്റ്റ് ചര്ച്ചിന്റെ അസിസ്റ്റന്റ് പാസ്റ്ററായ റവ. ദാല് തൌണ് തുവാങ്ങിനെയാണ് പട്ടാളം വെടിവെച്ചുകൊന്നത്.
ലംസാങ് ചര്ച്ചില് 22 വര്ഷം സേവനമനുഷ്ഠിച്ച പാസ്റ്റര് തുവാങ്ങിന് ഭാര്യയും 2 മക്കളുമുണ്ട്.
സെപ്റ്റംബര് 16-ന് ലംബാങ് ഗ്രാമത്തില് വച്ച് അദ്ദേഹത്തിന്റെ സംസ്ക്കാരം നടന്നു. അടുത്തുള്ള ഒരു ഗ്രാമത്തില് ആത്മീയ ശുശ്രൂഷകള് നിര്വ്വഹിച്ച് മടങ്ങുമ്പോള് കാപ്റ്റെ പാലത്തിനു സമീപം വച്ച് പട്ടാളക്കാര് പാസ്റ്ററെ 3 തവണ വെടിവച്ചതായി റിപ്പോര്ട്ടുകളുണ്ട്.
നെഞ്ചിലും വയറിലും തുടയിലും വെടിയുണ്ടകള് തുളച്ചു കയറിയിട്ടുണ്ട്. ജൂണ് 4-ന് പട്ടാളം റവ. വില്യമിനെയും മറ്റൊരു ക്രിസ്ത്യാനിയായ നാംബിയുവിനെയും കൊലപ്പെടുത്തി.
ഓപ്പണ് ഡോര്സിന്റെ കണക്കുകള് പ്രകാരം 2022 മുതല് 2025 വരെ മ്യാന്മറില് 149 ക്രിസ്ത്യാനികള് കൊല്ലപ്പെടുകയും 219 പേര് തടവിലാക്കപ്പെടുകയും ചെയ്തു.
