ബെയ്റൂട്ടില് യിസ്രായേല് സേന ക്യൂ ആര് കോഡുകള് അടങ്ങിയ ലഘുലേഖകള് വര്ഷിച്ചു; ഭയന്ന് ലബനന്.
ഒരു യിസ്രായേലി വിമാനം ലെബനനിലെ ബെയ്റൂട്ടില് ക്യൂ ആര് കോഡുകള് അടങ്ങിയ ലഘുലേഖകള് വര്ഷിച്ചതായി ലെബനന് സൈന്യം അറിയിച്ചു.
ഇത് ലെബനന് സൈന്യത്തിലും അധികാരികളിലും ഭയം സൃഷ്ടിച്ചതായി റിപ്പോര്ട്ടുകളുണ്ട്. ഏജന്റുമാരെ റിക്രൂട്ട് ചെയ്യുന്നതിന് ഉത്തരവാദികളായ ഒരു യിസ്രായേലി രഹസ്യാന്വേഷണ വിഭാഗത്തിന്റെ ഇലക്ട്രോണിക് കോണ്ടാക്ട് ചാനലുകളിലേക്ക് നയിക്കുന്ന ക്യൂ ആര് കോഡാണെന്നാണ് ലെബനന് സൈന്യം കരുതുന്നത്.
വാട്ട്സ്ആപ്പ്, ഫേസ്ബുക്ക് തുടങ്ങിയ ആശയ വിനിമയ പ്ളാറ്റ്ഫോമുകളിലേക്ക് കോഡുകള് നയിക്കുന്നുവെന്നും രഹസ്യാന്വേഷണ പ്രവര്ത്തനങ്ങള്ക്കായി അവരെ റിക്രൂട്ട് ചെയ്യുന്നതിന് സാധാരണക്കാരെ ബന്ധപ്പെടുക എന്നതാണ് ഉദ്ദേശമെന്നും ലെബനന് സൈന്യം പ്രസ്താവനയില് പറഞ്ഞു.
കോഡുകള് സ്കാന് ചെയ്യുന്നതോ ലഘുലേഖകളില് ഉള്പ്പെടുത്തിയിരിക്കുന്ന ലിങ്കുകളില് ക്ളിക്കു ചെയ്യുന്നതോ നിരോധിച്ചുകൊണ്ട് ലെബനന് സൈന്യം സാധാരണക്കാര്ക്ക് മുന്നറിയിപ്പ് നല്കി.
ഈ നടപടി സാധാരണക്കാര്ക്ക് നിയമപരമായും സുരക്ഷാപരമായും അപകടങ്ങള് ഉണ്ടാക്കുന്നതിനും മൊബൈല് ഫോണുകള്ക്ക് ദോഷം വരുത്തുന്നതിനുള്ള സാദ്ധ്യതയുണ്ടെന്നും ഉപകരണങ്ങളുടെ കടന്നു കയറ്റം, വ്യക്തിഗത വിവരങ്ങളിലേക്കുള്ള ആക്സസ് എന്നിവ ഇതില് ഉള്പ്പെടുന്നുവെന്നും പ്രസ്താവനയില് പറയുന്നു.
ലെബനനിലെ ഹിസ്ബുള്ള തീവ്രവാദികളുമായി യിസ്രായേല് സേന നടത്തുന്ന പോരാട്ടത്തിനിടെയാണ് ഇങ്ങനെയൊരു സംഭവം.
